A Festa da Troita, declarada de Interese Turístico de Galicia, ten lugar todos os anos desde 1967 o último domingo do mes de maio en Ponte Caldelas. O nacemento desta celebración está vinculado á iniciativa dun grupo de pescadores locais, os cales quixeron aproveitar a abundancia de troitas nos ríos do municipio para reforzar e apoiar a actividade da pesca e promover a un tempo a imaxe e a economía do municipio.
Dentro da festa é especialmente sobranceira a exaltación da troita, procedente dos ríos Oitavén e Verdugo, e que se prepara en todas as súas especialidades, que o público pode saborear.
Cabe destacar, dentro do programa da Festa da Troita, a celebración do Concurso Internacional de Pesca Deportiva, na variedade de salmónidos, de gran sona en Galicia e no norte de Portugal. A popularidade deste certame é tal que afeccionados do país veciño se achegan até Ponte Caldelas para participar.
