A localización, a escasos metros do río, o ámbito boscoso e as ruínas dunhas antigas instalacións, que se remontan a 1915, dotan a estes baños dun encanto especial, xa que aínda permiten o baño termal en augas fluoradas e sulfuradas
Os Baños de San Xusto están situados na marxe esquerda do río Lérez, en Barbeitos, na parroquia de San Xurxo de Sacos (Cotobade). Reciben o seu nome dun antigo balneario, construído a principios do século XX, hoxe en ruínas. Antigamente, a xente viña de todas as partes da provincia de Pontevedra, e tamén de fóra dela. Estas augas foron e son moi gabadas, sendo entón, aconselladas e receitadas polos médicos para distintas doenzas: estómago e aparato dixestivo en xeral, fígado e sobre todo para as cutáneas. Aínda hoxe hai dúas antigas bañeiras que decoran o recinto.
Nas súas inmediacións se situa unha área recreativa que dispón bancos e mesas de pedra. O seu ámbito é unha zona cargada de historia e de elementos de gran valor arquitectónico e paisaxístico, como fontes de auga termal, unha ponte medieval, catro muíños, e as súas canles así como camiños históricos.
